奧運採訪有禮又體貼 方力申獲讚「世一」
方力申（小方）獨家專訪奧運選手細心觀察，臨場提問體貼有針對性再贏正評，網民盛讚小方是「採訪界世一」，胡楓、曾志偉更越洋認證鼓勵 。
前日（3日），港隊游泳隊代表派出何詩蓓、歐鎧淳、簡綽桐及譚凱琳出戰女子4×100 混合泳初賽，最終雖然無緣晉級，四位選手接受小方訪問時卻笑得相當開懷，當中「五朝元老」歐鎧淳更被小方弄得又喊又笑。小方感觸謂：「16年喇（經歷奧運），真係一啲都唔容易呀！」更順勢Tag歐鎧淳講出自己的感受，此時歐已忍不住抹淚：「所以我真係好感恩，好開心最後佢哋（其他3名成員）陪我一齊游。」
數次訪問何詩蓓的小方，竟還能想出「新花款」與詩蓓互動，小方問何詩蓓如何看待近年冒起的「快靚正」訓練運動員文化時，成功激發詩蓓再派正面勵志Bite：「我唔相信呢個世界有捷徑，所以我覺得如果你要成為成功嘅人士，你一定要下好多苦功，尤其是當冇人見到嘅時候，係更加需要好努力咁繼續辛苦落去，要成功一定要努力。」 最後小方問四人比賽後最想做的任性事，結果四人都回答與食物有關的問題，當中何詩蓓笑言想食雞蛋仔。對於小方這個獨家專訪，網民讚不絕口。
前日，小方接受無綫官方社交媒體越洋訪問，並分享了採訪心得及事前準備工夫：「因為每次佢哋（運動員）過嚟都係得兩三分鐘，同埋大會會先做運動員訪問，所以過嚟時運動員可能已經需要休息及放鬆，所以一定要設定唔同類型嘅問題。」
他表示最難忘的是訪問何詩蓓，他說：「我會假設對方攞金牌、攞銀牌、攞銅牌、有獎牌、冇獎牌、有意外會問咩，喺佢游嘅過程又要觀察有冇嘢可以講返，例如佢200米自由泳三個50米都係第一名嘅，我就話佢勇者無懼。因為肯衝就係佢嘅策略同膽識。我𠵱家講返都覺得壓力大。」小方又指由於很多時要針對運動員臨場發揮問問題，變相事前做的功課或準備都有可能白費。
談到是次好評如潮，小方笑言：「係收到好多Message呀，胡楓（修哥）、安安姐（余安安），獎門人（曾志偉）都有鼓勵我；但都係嗰句，我唔係好叻，我都好緊張，但我覺得最重要係將運動員或被訪者嘅信息畀到觀眾知道，我只不過係要諗一啲問題等佢答嘅時候發揮到，同埋盡量問一啲有特色啲嘅問題，做記者最難嘅係，𠵱家太多人關注我哋嘅言行，對前線嚟講都係好大嘅壓力。」
